أحد ٍ يموت وطيّب الذكر يحييه ...

[! عابر سبيل !]

يا جاهل ٍ مر الزمان وحلاته

خذ هاك عقلي مانفعني ولا بيه

في هالزمان الطيب اعلن وفاته

الطِيب مات وكل طيّب يعزيه

يرحمك ياعود ٍ حفظ لك وصاته

يبيك تتبع ساقته ما تخليه

علمك سيئات الزمن وإحسناته

يامرك بالمعروف ليتك تماشيه

الله وهبنا دين واحسن صفاته

وانزل لنا التشريع واجزل معانيه

الحق والباطل عرفنا جهاته

وما يزرع المخلوق له يوم يجنيه

أحد ٍ له الدنيا على الكيف جاته

الله عطاه وكل شيٍ بـ اياديه

ما ذاق لوعات الزمان وشقاته

الفقر والتجويع يسمع بطاريه

وأحد ٍ يدور في زمانه نجاته

يبي الستر والعافيه بين اهاليه

عزيز نفس ولا يبدّل عباته

راضي ويدري عيشته ما تكفّيه

وأحد ٍ أبد ماخذ طبايع خواته

ضعيف رآي وكلمته ما تقديه

وأحد ٍ لبس ثوب المراجل بذاته

وا سِعد عين اللي من الضيق ناصيه

وأحد ٍ صميدع يرهبك بـ إلتفاته

حرٍ مطالعيه عن الناس تغنيه

وأحد ٍ يضيع صيدته من عماته

لا واخساره من ترجّى يعشيه

وأحد ٍ زرع ما نال غير الحتاته

الحظ كنه واقف ٍ له معاديه

وأحد ٍ قطف ورد الزمن وإثمراته

باب البخت مفتوح دايم يناديه

(( وأحد ٍ تساوى في حياته مماته

وأحد ٍ يموت وطيّب الذكر يحييه ))

الوقت لو يومي عليك بعصاته

ماهي غريبه منه هذي مماشيه

يابوي هات اللي يجي منك هاته

راضين باللي ماتكنه وتخفيه



وسلامتــــــــــــــــــــكم