ملف كامل للحصول على الشعر الحرير

[صقر الانبار]

الشعر الحرير






مع الصيف والحر والعرق الشعر بيتعرض لمشاكل كتير قوي زي مثلا الجفاف والتقصف وفقدان اللمعان والتساقط والهيشان وغيرها من المشاكل اللي بيتعرض ليها الشعر...
علشان كده بتلاقي إن شعرك في الصيف تحديدا محتاج إلى عناية مزدوجة أكتر من أي وقت تاني..
طبعا هتسألي نفسك وتقولي يعني إيه عناية مزدوجة..؟ ما أنا باغسله كويس وباسرّحه وخلاص! وهو في اهتمام وعناية أكتر من كده.. ولا هو كتر كلام وخلاص...؟
الموضوع مش كتر كلام وخلاص لأن الشعر فعلا في الصيف محتاج إلى عناية من نوع خاص...

و هاقول لك دلوقت على شوية نصائح للعناية بالشعر في الصيف





نشوف النصائح مع بعض


النصيحة الأولى
غسيل الشعر




شوفي يا ستي ياريت إن عدد مرات غسيل شعرك في الصيف ما تزيدش عن مرتين، طبعا أنت دلوقتي هتقولي ازاي.. ده أنا كل شوية بادخل الحمام وآخد دش...
هاقول لك مفيش مشكلة إنك تاخدي دش بس ياريت إنك تحطي بونيه على شعرك؛ وده لأن كتر غسيل الشعر على الفاضي والمليان بيخلي الشعر يفقد لمعانه وحيويته، وكمان ممكن إنه يتعرض للتقصف.
وخدي بالك كمان من الميه اللي بتغسلي بيها شعرك إنها ماتكونش ميّه سخنة قووي، أو ميّه بادرة قوووي، يعني من الآخر اغسليه بميّه فاترة، وده علشان تحافظي على لمعانه.


النصيحة التانية
استخدمي الشامبو والبلسم المناسبين لنوع شعرك




ودي حاجة مهمة قوووي لازم تاخدي بالك منها وهي إنك تستخدمي الشامبو والبلسم المناسبين لنوع شعرك...

يعني مثلا لو كان شعرك دهني يبقى استخدمي الشامبو اللي بيكون مكتوب عليه خاص للشعر الدهني.
وياريت إنك تخففي الشامبو بشوية ميّه قبل ما تحطيه على شعرك واوعي تنسي تشطفي شعرك كويس وتخلصيه تمامًا من أي آثار للشامبو أو البلسم.


النصيحة التالتة
استخدمي الزيوت المغذية لشعرك




لو عايزة تحافظي على لمعان وحيوية شعرك في الصيف يبقى ياريت تستعملي الزيوت الطبيعية المغذية للشعر زي "زيت جوز الهند وزيت الزيتون" وده لأن الزيوت دي بتساعد على الحفاظ على الشعر، خاصة لو كان الشعر ده جاف.
وكمان ياريت إنك تعملي حمام زيت لشعرك وليكن حتى مرة في الأسبوع لأن ده بيعوض الشعر عن الدهون اللي بيفقدها نتيجة العرق...


ودي طريقة عمل حمام الزيت
قسمي شعرك لأربعة أجزاء.
حطي الزيت على فروة رأسك ولغاية أطراف شعرك، خلي كل قسم لوحده حتى نهاية الرأس.
اعملي مساج خفيف لفروة الرأس علشان تتأكدي من وصول الزيت لجميع أجزاء أم الشعر
غطي شعرك ببونيه الشعر لمدة عشرين دقيقة.
اغسلي شعرك بالمية الفاترة وبعد كده بشامبو وبلسم مناسب لنوع شعرك.
النصيحة الرابعة
ابعدي عن الصبغة ومجفف الشعر




إيه رأيك لما تخلي الصيف فرصة إن شعرك يكون طبيعي وتستغني فيه عن مجفف الشعر والصبغات نهائيا في فصل الصيف، ود لأنها مضرة جدا جدا على الشعر، وكمان مش هتقعد كتير في شعرك نتيجة زيادة كمية العرق.


النصحية الخامسة
ابعدي شعرك عن المية المالحة




ياريت إنك تلبسي بونيه للشعر وأنتِ نازلة البحر، وده علشان تبعدي شعرك عن الميّه المالحة اللي بتضر الشعر .


النصحية السادسة
هوّي شعرك




ياريت إنك تهوّي شعرك باستمرار وأنتِ في البيت وبلاش موضوع إنك تعمليه "كحكة" باستمرار، يعني افرديه شوية اعمليه ضفيرة شوية، اعمليه ديل حصان شوية، يعني من الآخر دلّعيه وبلاش تحبسيه.

كمان لو كنتِ محجبة بلاش إنك تلبسي الحجاب وشعرك مبلول، استني لما ينشف وبعد كده البسي الحجاب.

النصيحة السابعة
اعملي مساج لجلدة الراس




وأنتِ قاعدة في البيت ياريت إنك تعملي مساج لجلد رأسك عن طريق استخدام أطراف صوابعك في عمل تدليك لفروة الرأس....

وعلى فكرة الموضوع ده بيحافظ على سلامة جلدة الرأس لأنه بيزيد من تدفق الدم عبر الأنسجة مما يؤدي إلى وصول كمية أكبر من الغذاء والأكسجين إلى الشعر، كما يساعد على التخفيض من حدة التوتر في جلدة الرأس اللي بتسبب تساقط الشعر.


النصيحة الثامنة
اهتمي بنوعية غذائك




في بنات كتير بتفتكر إن الشعر بيتغذى من الخارج بالشامبوهات والكريمات والزيوت وده طبعا مش صحيح لأن الشعر بيستمد غذاءه من الجسم نفسه....

علشان كده ياريت إنك تكتري من أكل الخضروات الطازجة والفاكهة الطازجة وابعدي عن التيك أواى والمعلبات لأنها مش بتفيد.

 

 

[tindra]

جزاك الله كل خير
الف شكر

 

 

[صقر الانبار]

مشكوره يالغالية تندرا جزاكي الله خير الجزاء على مرورج الرائع