[أميره]

السلام عليكم و رحمة الله و بركاته ...
أنا نفس أي بنت ... من صغري اتمنى أعيش حياة طبيعيه ... يعني يكون عندي اهل و زوج و أطفال و بيت و... و كل شي
لكن .... الحمدلله على كل حال .... هذا قدري ...
اني اعيش محرومه من الاطفال و أبسط شي ... العائله
قصتي بدأت من قبل ولادتي ...لما أبوي تزوج أمي سنة 1983 ... هو أكبر منها بعشر سنوات .. كان توه مطلق و عنده من مرته الاولى بنت ...و أمي من جنسيه ثانيه ... غير جنسيته
و طبعا أمه و أهله ما رضوا فيها ...و حاربوها بكل الطرق .... لكنها كانت تدور قربهم بأي طريقه ... عشان ترضي أبوي ...
بعد 3 سنوات من زواجهم .... توفى أبوي ....
توفى ....و ترك بنتين و ولد لامي اللي كان وقتها عمرها 21 ...
الله يرحمه و يرزقه الجنه
و الناس حتى بالوفاه أحسدوا امي .... بالعزاء كانوا يقولون : ما شاء الله مات و ترك لها بيت لها بروحها !!!
تخيلوا !!! حتى الموت ينحسد عليه .... لا حول ولا قوة الا بالله
طبعا امي جتها حاله نفسيه ....و خافت من تربيتنا ... و من الحياة ...و من كل شي
لكن الحمدلله ...خالتي موجوده و مساندتها من صغرنا ..
المهم ... انه عمامي و عماتي ما رحموا امي ....حتى بعد وفاة الوالد الله يرحمه ... كنا نسمعهم يتكلمون عننا و عن أمي ... و يتدخلون بحياتنا
و البيت اللي الكل حاسدينها عليه .. عمامي و أختي وارثين معانا فيه .... يعني لو نبيعه ما راح نكسب منه شي
و الوالده الى اليوم مو راضيه تبيع البيت .... لان الوالد الله يرحمه هو اللي مصممه و تعب عليه
و بما اننا 3 أبناء .... طبعا البيت فاضي من الاطفال ... لانه أنا الكبيره فيهم .. أختي أصغر مني ب سنه و نص ...أخوي أصغر مني ب 3 سنوات
أما أختي الكبيره ...أكبر مني ب 3 سنوات ...كانت عايشه عند أمها ....ما نعرف عنها اي شي ولا تتصل أو تسأل فينا .... كنا احنا اللي نتصل و احنا اللي نروح لها بالمناسبات والاعياد ... و أمي تقول انا بس أبيكم توصلونها عشان الغالي الله يرحمه ...
و طبعا أمي نفس أي أم ... تبي تشوف بناتها متزوجات و تبي تشوف أحفادها
تزوجت أنا من 4 سنوات و نص .... من أنسان ما أقدر أوصفه بالكلمات .... انسان نساني طفولتي المره ... نساني كل المشاكل اللي بحياتي ... طيب حنون ...ما يرفض لي أي طلب ..
لكن للحين الله ما أراد أني أحمل ... بسبب الهرمونات ...
هو دايم يقول لي : انتي أهم عندي من الاطفال ... انتي كنز ...ما يعوضني عنج أي طفل ...
أدري انه يحبني لكن بأوقات كثيره أشوف الحزن بعيونه لما يلعب مع عيال خواته و عيال اخوانه اللي أنولدوا من بعد زواجنا ...
في أول زواجنا .... كنت يوميا بالليل بعد ما زوجي ينام ... أبكي الى ان تجف دموعي ...
أبكي من كلام الناس و من حياتي و من أني مو قادره أسعد زوجي المسكين ...
حتى اني في مره واجهته ...و قلت يمكن الله ما يبينا نجيب أطفال من بعض ....
قعد يبكي و يقول لي ليش تقولين هذا الكلام !!! أنا ما أبي شي من الدنيا غيرج.
للحين أدعي انه الله يرزقني بذريه صالحه تسعدني و تسعده ....
ذريه تعوضني عن طفولتي و عن كل الكلام اللي سمعته ....من أهل زوجي اللي ما يرحمون ...
ربي هب لي من لدنك ذريه طيبه انك سميع الدعاء
ربي لا تذرني فردا بالارض و انت خير الوارثين
الله يرزقني بالذريه اللي تقر عيني ...و تتغير حياتي للاحسن ...
و أسعد زوجي و أمي اللي تحملت علشانا كثير ...و أفرح اخواني و أهلي ...
نسيت أقولكم انه اختي من أبوي .... الله رزقها بزوج ... جابت منه بنت و ألحين حامل ...و طبعا كل حمل لها تخفي عننا انها حامل ... تخاف اني احسدها .... انا والله عمري ما افكر احسد أي أحد ...و أتمنى انه الله يرزق اختي و أخوي بالازواج الصالحين و بالذريه اللي تريحهم ... و حتى لو ما كان عندي أطفال ...أكيد راح أفرح لهم ...لان عيالهم هم عيالي
دعواتكم حبيباتي ....
و شكرا على المتابعه